الأحد، 27 مايو 2012

شفيق بيننا وبينه دم


إلي المهندس محمد هيثم
يا بشمهندس أنا كنت ناوي ما أروحش للإعادة من شدة الإحباط والغضب إن شفيق يوصل للإعادة ولأني من الأول مش مقتنع إن مرشح الأخوان ينفع يكون رئيس لمصر بعد الثورة. لكن  بعد ما هديت شوية من الصدمة و قرأت ما كتبه الدكتور القرضاوي في فتواه أن التصويت ضد شفيق واجب شرعي (راجع المقال والوصلة):
"القرضاوي للمصريين: إسقاط "شفيق" واجب ديني وشرعي وخلقي"
 وبعد فتوي الدكتورنصر فريد واصل (راجع المقال والوصلة):
"د. نصر فريد واصل: التصويت للفلول في انتخابات الرئاسة خيانة "
  قررت إن مش ممكن نضيع أصوتنا، ومن مبدأ الانتصار لمصر والمصريين في حقهم إن ما يجيش مبارك تاني ورغم إني لا أثق في الأداء السياسي ولا المنهج الأخلاقي  لسياسة  الأخوان في الشهور الماضية بدءاً من اتهام الثوار والانقلاب عليهم في كل موقف بعد وصولهم للبرلمان والخوض في سمعة بنات مصر والاستهزاء بمن أصيبوا أو لقوا مصرعهم أو تم تعريتهم في الميدان ومروراً بكردونات ومليشيات الدفاع عن مجلس الشعب بعد أن ضمنوا وصولهم إليه والدفاع عن المجلس العسكري بعد ضمان المصلحة وإهانة الثوار في المجلس والادعاء عليهم بالخيانة هم ورموز وطنية أخري وناهيك عن الصفقات الواضحة مع العسكري لضمان استمرار السلطة  ثم وصولاً إلي الصراخ والعويل من سوءات المجلس العسكري والاستنجاد بالثوار مرة أخري بعد استبعاد خيرت الشاطر ثم الانقلاب علي الحكومة وأزمة سحب الثقة ثم مدح الحكومة وتجديد الثقة رغم عدم حدوث أي تغير جوهري سوي تهديد المجلس العسكري والحكومة بورقة حل مجلس الشعب. لكن رغم ده كله أنا خدت قراري إننا بإذن الله مش ح نضيع أصواتنا لأن ده ح يكون لمصلحة شفيق. وشفيق يا بشمهندس اللي بينا وبينه دم.
 مع خالص دعائي لمصر بالعزة والعافية.
د. محمد زكربا الأسود

هناك 10 تعليقات:

  1. كتب الأسوانى انه لو تشاجرت مع اخيك لأنه انانى و قامت فى بيتك حريقة هل ستنسى الخلاف و تتعاون معه أم هتسيب البيت لما يقع على دماغتكو!!..........فلازم كلنا و احنا رايحين ننتخب مرسى نفتكر أن أحنا مش رايحين ننتخب مرسى احنا رايحين نسقط شفيق. D:

    ردحذف
    الردود
    1. وجهة نظر برده يامؤمن صح، على مبدأ أنا وأخويا على إبن عمي، بس هوه مرسي أخونا؟:D ، مش لما مرسي الأول يثبت إنه أخونا مش أخوانجي :؛)

      حذف
  2. لا أمان لمتلون ولايملك برنامج نابع من أفكاره وإحساسه بالوطن ولكن معمول له برنامج يخدم أهداف جماعة وليس وطن ، وفي نفس الوقت لا استقرار مع شفيق ولا أمان لتحولاته وولائه الخفي للنظام السابق ولو لم نشق عن قلبه ونواياه.
    ببساطة، يظل لاأمان لمتلون ولم يفكر ولم يشعر بمايحتاجه الوطن واختزل كل شئ في كلمة "النهضة"، ولا أمان لعقلية من عهد ظالم وفاسد.إحنا في ورطة ببساطة.

    ردحذف
  3. ببساطة واحد لايملك مشروع نابع من إيمانه به لانه ببساطة مش هوه إل حلم بيه ولا عمله ولا نشعر بصدقه أو انتمائه لأي كلمة به،فقط كتيب في يده يقرأ منه توجهات غيره وأحلام الجماعة ، وفي النهاية بيلوح بكلمة "نهضة" ،هي إيه النهضة؟ النهضة أن ننهض بروح شعب من كتر الهموم إترنح ومابقاش عارفة يقف حتى على رجله فايق،
    مش بنقاط واحد إتنين ،تلاتة.

    ردحذف
  4. صديقي الغالي مؤمن
    طبعاً يامؤمن أنا متفق معاك ومع الأستاذ الأسواني. وانا يامؤمن بافكر في البيت اللي ممكن يقع علي دماغ مصر كلها لو فضلنا علي زعلنا مع أخوك الأناني إياه. مع حبي وتقديري

    أبوك محمد زكريا الأسود

    ردحذف
    الردود
    1. ماهو لإن أخونا الأناني "أناني، وطبقا لسيكولوجية الأناني يادكتور، فهو أول ماننقذ البيت ومش يقع على دماغنا ودماغه، أول واحد حايقولك أنا ومن بعدي الطوفان. وألا إيه؟

      حذف
  5. الغالية فجر قمرية
    نعم يافجر نحن في ورطة الاختيارين أحلاهما يحمل قدراً من الخوف والخطر ليس بقليل. لكن يافجر بحسبة بسيطة وإن كانت مرة المذاق، عدم الذهاب يجعل فرصة شفيق أكبر، والذهاب لاختيار مرسي يخيف الكثير، والذهاب لإبطال الأصوات يجعل إلغاء الانتخابات متوقعاً وهو ما يمكن أن يطيل عمر بقاء العسكري والفوضي معاً علي قلب الوطن، الامتحان صعب يا فجر وإن كان بيننا وبين الإخوان اختلاف وعدم ثقة لكن يبقي بيننا وبين شفيق دم، لنا عنده دم يا فجر. مع خالص التحية والتقدير

    ردحذف
    الردود
    1. أنا مش خايفة من مرسي ولا كتلة الدقون ال وراه، أنا ببساطة مش مقتنعة أن هذا يكون رمز لمصر ويعبر عنها ويمثلها.كيف تنتخب رئيس لاتحترمه وتشعر إنه أصلا مفروض عليه هذا الوضع" إستبن ببساطة لتاجر شنطة سابق، ليه كده الناس ده مستهونه بمصر؟ كبيرة أوي عليهم يادكتور كبيرة أوي والدليل ، إنهم غرقوا تحت قبة برلمان، فما بالهم بسما مصر؟

      حذف
  6. فالنعترف ليس هذا بحضور ولا روح ولا شخصية رئيس لمصر ،كبيرة أوي مصر ياناس على كتيب وبس، وليست مصر قسم في شركة عشان يأتي شفيق ليديرها زي شركة الطيران بمجرد تعليمات وال تحت إيده ينفذ ، ببساطة الاتنين فاقدين لروح المصداقية والاخلاص فعلا لوطن، كل واحد وله توجهاته بس الأكيد مش عشان مصر ولا في حب مصر.
    هي الثورة إتعملت عشان في الآخر أنزل مضطرةومفروض علي اختار واحد نكاية في واحد؟!الأكرم لي أقاطع لا ده ولا ده والله يسامحه أبو الفتوح بتلونه إل حطنا في الورطة ده فعلا.

    ردحذف
    الردود
    1. الغالية فجر قمرية
      أنا قلت قبل الانتخابات يافجر أنا نازل أنتخب علشان مش عاوز موسي ولا مرسي ولا شفيق، لكن هذا قدرنا، وبعدين أنا ح انزل مش نكاية في شفيق لأ يافجر علشان خوفي من شفيق علي كل الولاد، اللي أجدع من مليون واحد زيي، اللي عملوا الثورة العظيمة دي، خايف عليهم من انتقام النظام الذي يمثله باقتدار السيد الفريق، وعلشان خايف علي الحلم اللي أنا لسه متمسك بأطرافه، وعلشان خايف بلدي تبقي أسوأ مما كانت عليه، وعلشان خايف ولادي يفضلوا في غربة طول عمرهم كرهاً في العودة لحضن نظام كاره للمصريين، أنا رغم إن رأيك في مرسي والأخوان يوافق رأيي ومش واثق فيهم وشاكك في صدق نواياهم لكن في نفس الوقت شبه متأكد من إن شفيق هو امتداد نظام فاسد مذل لن تسلم مصر وهي تحت يده. أنا بإذن الله ح انتخب مرسي وده رأيي بعد عذاب التفكير ورأيي لا يحجر علي رأيك أو رأي حد فكل منا تحكمه حسابات تختلف معاييرها لكني أعلم أنك عينك علي مصلحة هذا الوطن والذي لا نرجو له جميعاً إلا العزة والعافية. مع خالص تحياتي وتقديري.
      د. محمد زكريا الأسود

      حذف